Roxas City, Capiz- Napilian ang Brgy. Banica bilang Most Outstanding Barangay Tanod – City Group Category sa Search for Best Barangay Tanod nga programa sang Department of Interior and Local Government(DILG).
Ang nasambitan nga barangay ang nagpangibabaw sa mga kasumpong nga barangay sang Baybay, Cagay, Lawaan kag Milibili.
Sa iya mensahe, ginsiling ni Punong Barangay Victor Dolor, ginhimo lamang nila ang tanan kag nangin handa ang 25 ka bilog sini nga katapo sang Tanod sa patag sang rescue, fire fighting, crisis management kag iban pa subong man na-comply nila ang ginakinahanglan nga dokumento sang evaluation team.
Kahapon sang aga nag-conduct sang evaluation ang composite team nga ginalakipan sang DILG, PNP, BFP, PDRRMO-Aksyon Tabang kag BJMP sa mga Barangay Tanod sang Banica bilang preparasyon para sa regional level competition.
Samtang nagapati si PDRRMO-Aksyon Tabang Officer Mr. Speed Pelaez nga preparado na ang mga Barangay Tanod sang Brgy. Banica.
Ginsiling ni Pelaez nga halos na-comply sang amo nga barangay ang pila ka mga barameters nga gin-set para sa nasambitan nga kompetisyon.
Paglab-ot sa documentation, gamay na lamang suno sa iya ang iga-pinalisar sang mga ini agod nga mangin preparado sa regional level competition.
Ang provincial search committee ang ginabug-osan nanday PSINSP Ruby C. Magallanes sang Capiz Police Provincial Office; FO3 Vincent F. Meñez sang Office of the Provincial Fire Marshal; JO2 Ann Marie D. Garcia sang BJMP; Genelcar Besana sang LIGA Office kag Mr. Esperedion Pelaez sang PDRRMO-Aksyon Tabang samtang yara man ang presensiya ni DILG-Capiz Provincial Director John Ace A. Azarcon.
Samtang lauman nga sa nahauna nga semana sang Hulyo, igapaidalom ang nasambitan nga barangay sa regional evaluation sang Search for Best Barangay Tanod sang DILG.
(photo: PDRRMO-Aksyon Tabang)
