General Santos City—Buot maklarohan ni South Cotabato First District Congressman Pedro Acharon Jr kung asang dapita ug sa unsa nga pamaagi nahitabo ang gikaingong binilyon nga right of way scam sa mga national highway.
Sumala ni Acharon nga sa Pilipinas daghan gyud ang mga right of way claim. Pagpaklaro ni Acharon nga kini mao ang mga pribadong yuta nga gigamit sa gobyerno ug sa diin gina-bayran sa gobyerno ang mga nanag-iya niini.
Kahibaloan nga usa ang diversion road sa Gensan ang gitumbok nga dunay anomalya sa hisgutanang right of way. Sumala ni Congressman Pedro Acharon Jr. nga angayan kining sutaon kung peke ba o dili.
Apan kwesyon sa opisyal kung hain ang anomalya sa proyekto nga anaa man ang maong dalan ug kini nakit-an man sa katawhan sa Gensan. Dunay pagduda si Congressman nga basin sa proseso o sa pagbayad nahitabo ang gikaingong anomalya sa right of way issue sa mga national highway.
Matud ni Acharon nga kini ang angayang tan-awon gumikan may posibilidad nga diha gipaagi ang gikaingong anomalya sa proyekto. Luyo niini gihingusgan ni Acharon nga ginaagi man sa daghang proseso sa mga ahensya sa gobyerno ang susamang proyekto ug gani duna may inspection team nga gikan pa sa kaulohang manila ang mulantaw niini. (Jordan Britos)
