Porcausa cay ta queda pono y front del gma juego illegal na mga barangay, el majority floor leader del consejo local Hon. Ceasar Jimenez,Sr ya suweri manda serra todol mga peryahan na entero ciudad amediante que todol mga operadores de estos ya man paso’ ya el permiso desdel govierno local.
Na dialogo ya conduci na consejo local enantes aga, el oficina de lisensya y tazador ya revela cay presentamente, todol gma lehitimo operadores del mga peryahan na ciudad ya termina ya el kinse diaz permiso de operar tal peryahan na govierno local, poreso rason para esta con el mga consejales si permiti pa conestos opera o hinde mas.
Ya queda largo el deliberasyon desfeus ya esta devidido el opinion del mga consejales aserca el serada del mga peryahan. Asegun con el proponent del dialogo Councilor Teodyver Arquiza, hinde le conforme manda serra con el peryahan porcausa cay ta dale este entretemiento con el publico, sin embargo, cumbiene lang queda stricto el mga otoridad, particular el ofisina del administrador y policia na aseguramiento cay nuay estos ta conduci ilegla juego adentro.
Por su parte, el consejal Rudy Lim ya abla tambien cay el descansada na dalida del permiso na mga peryahan un mal mensaje para con el mga parokyano de estos, especialmente na mga lejanos barangay que ta depende el alegria cada llegar el fiesta na peryahan lang.
Pero si Jimenez ta para duru con el su posisyon, ablando que mientras hinde ta fuede regula y nuay ordinansa el ciudad ta anda strictamente el regula con el operasyon del mga perya, cumbiene nomas ya anay dale conestos permiso continua el diila presensya na entero ciudad. – *Bhong Simbajon/RMN News*
