Ginpasiguro sang National Irrigation Administration ukon NIA-6 nga masuguran na ang konstruksyon sang mega dam sa Calinog, Iloilo, ang 11.2 billion pesos nga Jalaur River Multi-purpose Project II subong nga tuig.
Suno kay NIA-6 director Engr. Gerardo Corsiga nga target nila nga masuguran ang proyekto sa bulan sang Agosto apang kon may mga delay nga matabu, ila sa gihapon igaduso nga madayon ang construction subong nga tuig bangud may yara na sang kontrata ang proyekto.
Nahibaluan nga ang nagdaug nga contractor amo ang korean construction nga Daewo Engineering and Construction Company Limited.
Ginpahayag ni Corsiga nga wala pa sang schedule kon san-o pirmahan ang kontrata.
Suno sa iya nga may hiwaton pa nga pagtililipon para sa contract signing kag pagasundan sang groundbreaking ceremony.
Ginpasalamatan ni Corsiga si Presidente Rodrigo Duterte bangud ginsuportahan sini ang nasambit nga proyekto kon sa diin luyag sini nga madayon ang JRMP II project bangud daku ang mabulig sini sa kabanwahanan sa probinsya sang Iloilo kag bilog nga Western Visayas.
