Davao City – Gipusil patay ang usa ka construction worker sa wala mailhing suspetsado alas 3:00 sa hapon adlaw’ng Huwebes (July 1,2021) sa San Antonio, Brgy.19-B, Bajada, syudad sa Davao.
Sa inisyal nga inbestigasyon sa San Pedro Police Station, ang biktima mao si Virgel Capote, alias “Juan”, 40 anyos residente sa maong lugar.
Gisaysay sa inahan sa biktima nga si Agapita Capote, usa ka wa mailhing lalaki ang nisulod sa balay sa iyang anak nga nasuot og pula nga t-shirt ug black short pants, payaton, 5’5″ ang gitas-on ug misinggit pa ang suspek nga “HOY JUAN” pagkahuman nadunggan na lamang ang duha ka lanug sa buto sa armas.
Gisusi dayon sa inahan og iya nalang nakita nga nagbuy-od na sa salog nga wa nay kinabuhi ang iyang anak human nakaangkon og samad pinusilan sa walang bahin sa lawas nga miresulta sa kamatayon.
Gilayong misibat ang suspetsado padulong sa Ladislawa Garden Village kauban ang laing suspek nga maoy silbing look-out nga nagsuot og black t-shirt ug itum ang pantalon adunay gitas-on 5’6″.
Narekober sa SOCO team gikan sa crime scene, ang duha ka basiyo sa bala og duha ka deformed fire bullet sa .45 caliber pistol.
Gipalawman pa ang imbestigasyon sa kapolisan aron ma-establisar ang motibo sa pagpusil patay sa biktima.
RadyoMaN Don Pulayao
