Contact tracing sa nakaupod sang nagpositibo nga membro sang militar sa banwa sang Tapaz, nagapadayon!

Tapaz, Capiz – Ginpahayag ni Tapaz Mayor Roberto “Nonong” Palomar nga ginpadala na sa Roxas Memorial Provincial Hospital(RMPH) ang 24-anyos nga persona nga nagpositibo sa COVID 19 virus samtang ginapatigayon ang contact tracing sa ginabanta isa ka gatos(100) nga nakasalamuha sini. Suno sa alkalde ang amo nga persona ang membro sang Philippine Army kag residente sang Brgy San Julian banwa sang Tapaz. Basi sa inisyal nga impormasyon nga ila nga nakuha, naka-duty pa sa Camp Macario Peralta sa banwa sang Jamindan ang amo nga persona antes nga nagpauli sa Tapaz. Petsa 25 sang Hulyo, nagpakunsolta ini sa ospital matapos nga makabatyag sang pagkatol sang tutonlan kag pag-ubo kabangdanan nga ini ang ginpanugyanan nga magpaidalom sa test kun sa diin sang Hulyo 29, nagbalik ini kag nabal-an nga positibo ang resulta sini sa COVID-19. Sa subong, ginpaidalom na sang LGU sang Tapaz sa 14-days lockdown ang Barangay San Julian kun sa diin ulihi nga nagtener ang amo nga persona para nga malimitahan ang hulag sang mga tawo sa amo nga lugar.

Facebook Comments