Contreras: Same-sex civil union angay pang tun-an

36

Davao City – Walay social contract ilawom sa Family Code of the Philippines alang sa civil union sa lalake sa lalake ug sa babaye sa babaye nga magkahigugma-ay ug magka-uyon nga magpuyo na lang sa usa ka balay.

Matud ni Atty. Deo Contreras nga sa balaud walay naka-indikatar nga dunay social contract gitagana sa kapareho og kasarian kansang magkasabot og puyo ilawom sa pandong sa usa ka pinuy-anan lamang.


Nagtoo si Contreras, mao kanang butanga ang posibleng wala makita ug laomi sa mga magbabalaud nga muabot ang panahon nga magkuyog og puyo sa usa ka bubong ang kapareho og kasarian.

Gitataw sa Abogado nga wala sa’y gisulti ang balaud nga may kalapasan ug puwede kasohan ang sakop sa LGBT Community nga makig-ipon og puyo sa usa ka balay sa kapwa lalake ug sa kapwa babaye.

Ug kon aduna ma’y kasal-an makumitar ang LGBT member tungod sa kagustohan nga sila makabaton og katungod sa civil union kana mao ang pagsupak sa naturalismo nga pamaagi sa Diyos nga ilang giguba.

Bisan pa og unsay buhaton sa LGBT Community apan dili nila matuis ang kamatooran nga ang gibalaan sa Diyos nga panag-uban mao ra ang kaminyoon sa lalake ug babaye ug wala na’y lain pa.




Gipalanog pa ni Contreras nga ang pagduso sa civil union sa same-sex nga gisuportahan ni Pope Francis abnormalidad ug dili normal nga kinaiya sa usa ka lalake nga mahuyang ug sa babayeng lakin-on.

Busa gibati og kaluoy ang maong abogado sa LGBT Community gumikan sa ilang paningkamot nga mahatag ngadto kanila ang ilang gipangayo nga kalipay apan gikinahanglan ipatigbawbaw gayod ang gitugot sa Diyos ug sa balaud sa yuta.

Nasayran nga mi-ani og reaksiyon ang pagsuporta ni Pope Francis sa civil union sa same-sex apan gilimod kini sa Vatican sa pagtoo nga nasaypan lamang og sabot nahimong pamahayag sa Papacy labot sa LGBT Community.

RadyoMaN Joel Viray

Facebook Comments