Roxas City, Capiz – Dead on arrival sang gindala sa ospital ang coordinator sang Bayan-Capiz matapos maaksidente ang ginsakyan nga Isuzu MUX sa Barangay Baybay, Roxas City kaina sang kaagahon.
Ginkilala ang biktima kay Kashmir Diestro, residente sang Maayon, Capiz. Sa imbestigasyon sang Roxas City PNP sakay si Diestro sa nasambit nga salakyan nga ginamaneho ni Mark Abella kalakip ang ila duha pa ka mga kaupdanan nga sanday Jayson Billones kag Ryan Baquilar.
Nagbunggo ang unahan nga porsyon sang nasambit nga salakyan sa isa ka lubi bangud wala natalupangdan sang driver nga likuon ang porsyon sang karsada. Bangud sa mabaskog nga impact sang pagkabunggo, naglampos pa gid sa isa ka puno sang lubi ang nalikod nga bahin sang salakyan. Nahibaluan nga sakay si Diestro sa nalikod nga bahin sang salakyan.
Nag-angkon sang patal nga pilas sa ulo si Diestro nga gintunaan sang iya kamatayon. Suno sa report, lunsay nakainom ang mga biktima sang nagluntad ang aksidente.
