Davao City – Mibalibad sa pagtunol sa iyang komento si Davao City Third District Councilor Joselle Villafuerte sa pagsang-at og kaso ni Davao City Police Office (DCPO) Director P/Sr. Supt. Alexander Tagum batok sa napulo ka militante human nalapas ang Clean Air Act atol sa lihuk-prosteta sa miagi’ng adlaw.
Katarungan ni Villafuerte nga kuwang ang iyang kahibalo sa nahitabo’ng protesta sa mga militante sa may Freedom Park niadtong adlaw’ng Lunes busa tik-om kini labot sa lakang ni Tagum.
Apan segun ni Villafuerte, katungod sa mga militante ang pagpasibaw sa ilang mulo kay gitugutan man kini ni Pres. Duterte basta tawhay lang ug walay gubot ug dili mulapas sa mga balaod.
Hinoon nasabtan sa konsehala ang kapulisan sanglit trabaho man nila ang pagpatuman sa mga balaud busa kun aduna ma’y nakasupak sa kalagdaan angay lang dakpon ug pasakaan og kaso sa mga otoridad.
Gikumpirma pa niini nga sa pagkakaron, wala pa’y lokal nga ordinansa ang syudad may kalabutan sa Clean Air Act.
Daan nang gibatbat ni Tagum nga nalapas sa mga lider sa mga militante ang Clean Air Act human ilang gisunog ang effigy ni Pangulong Duterte sa niadtong Lunes.
Sa pikas bahin, suportado ni Task Force-Davao Commander Col. Nolasco Mempin ang lakang ni Tagum batok sa mga militante.
RadyoMaN Joel Viray
