General Santos City—Dili makatuo si City Councilor Beth Bagonoc sa mga pasangil batok sa iyang mga kaubanan sa konseho nga sila si kagawad Jeng Gacal, Kagawad Yumang, Milleza ug Lagare nga sila mga narco-politician.
Sumala ni Bagonoc nga nakaila sya kaayo sa iyang mga kaubanan ug layo ra kaayo sa tinuod ang maong akusasyon. Gani ila nalang dayon nga gihuman ang diskusyon bahin niini sa konseho tungod kay peke nga balita ug dili angayang tagaan ug bili ang maong isyu.
Sukwahi hinuon sa pagtoo ni Kagawad Jeng Gacal gibutyag ni Kagawad Beth Bagonoc nga layo lang ang motibong pamolitika nganong gilambigit sa isyu sa droga ang panagalan sa upat ka mga konsehal sa syudad.
Sumala ni Kagawad Bagonoc nga kung basehan ang ilang relasyon sa Sangguniang Panglungsod nagkahiusa man silang tanan luyo pa man nga gikan sila sa managlahing partido sa politika.
Matud niini nga dinhi sa Gensan dili gyud makita nga dunay panagbingkil ang mga opisyales sukwahi kini sa ubang mga lugar sa nasud. Duda usab si Kagawad Beth Bagonoc nga duna lay mga tawo nga nasilo o nasuko sa mga konsehal tungod kay wala matuman ang ilang gustong himuon sa dakbayan sa Gensan.
Aminado si Bagonoc nga dili man usab malikayan nga dunay masuko kanila nga mga konsehal gumikan sa ilang trabaho dili man tanan ang matagaan ug katumanan ang mga hangyo. Samtang dili usab tanan nga mga gimbuhaton sa konseho ang mauyonan sa tanang katawhan. (Jordan Britos)
(Photo from FB)
