Davao City – Nakasabsan sa kinabuhi ang usa ka 82 anyos tungod sa COVID-19.
Sa pakighinabi sa DXDC RMN Davao kang Brgy. Pampanga Kapitan Constancio Tiongco, giingon niini nga sa wala pa namatay ang pasyente nga taga sa Brgy. Pampanga, Lanang, syudad sa Davao, gipailawom kini sa swab test sa usa ka pribadong hospital ug migawas ang resulta nga positibo sa maong balatian.
Matud sa kapitan, wala na magdugay sa maong hospital ang biktima ug gibalhin sa SPMC aron himuon ang ika-duhang hugna sa swab test apan sa wala pa migawas ang resulta, nakabsan na hinuon kini sa iyang kinabuhi.
Ang patay’ng lawas gipa-cremate na sa pamilya.
Gidugang ni Kapitan Tiongco nga kung mogawas nga positibo sa ikaduhang swab test, posibleng ipailawom na sab sa swab test ang iyang pamilya.
“Ang pamilya nagsulti nga nag-positive sa COVID-19 ang ilang Papa… Gipa-cremate nila niadtong Sabado pasado alas 2:00 sa hapon unya nagpaabot pud sa results sa ikaduhang swab test. Kung mag-positive, silang tanan pamilya magpa-swab test pud,” segun ni Tiongco.
RadyoMaN Don Pulayao
