Davao City – Pag seryoso sa pagsunod sa lakang sa gobyerno ang kulang sa publiko aron mapugngan ang pagsaka sa kaso sa Coronavirus kun COVID-19 sa Pilipinas partikular na dinhi sa Davao City.
Kini ang lantaw ni Davao City Councilor Conrado Baluran diin atol sa pakighinabi sa DXDC RMN Davao sa konsehal, giingon niini nga ang ubang tawo gi-take for granted matud pa ang gipatumang measures sa gobyerno nunot sa COVID-19 crisis gani giingon niini nga pipila ka mga indibidwal wala nahadlok sa virus bisan kumpleto na sa paghatag sa mga direktiba ug pahibalo ang gobyerno ngadto sa publiko.
“Ang problema naa sa mga tawo, ang uban murag way kahadlok ba, naanad sila nga mubalewala sa mga pahimangno so ang problema hulaton pa nila nga naay mahitabo sa ilaha mismo o sa ilahang silingan ayha sila mahadlok,” segun ni Councilor Baluran.
Busa pahimangno ni Councilor Baluran sa mga dabawenyo nga musunod sa mga angay buhaton aron makalingkawas niining krisis karon.
Samtang gibutyag usab sa konsehal nga suportado sa Davao City Council ang mga aksyon sa lokal nga gobyerno sa syudad karong panahon diin sila ang nagapaabot sa mga isyu kun problema sa lugar ngadto kang Davao City Mayor Inday Sara Duterte-Carpio, gamay o dinagko man aron dali kini maaksyonan.
RadyoMaN Renz Barbarona
