Davao City – Sukad mikaylap ang coronavirus disease kun COVID-19, daghan sa mga industriya nga maoy ligid sa pagdagan sa ekonomiya sa mga nasud sa kalibutan nangahagba ug wala pa makabangon hangtud karon.
Denhe sa Pilipinas, usa ang turismo sa mga industriya nga gilampornas og maayo sa nasangpit nga health crsis karon maong daghan sa mga magpapatigayon namawi sa ilang puhonan ug nanirado sa ilang mga establisimiento.
Sumala ni Davao City Tourism Officer Generose Tecson, ikatulo ang turismo sa daghang industriyang nag-ambag diha sa pagpalig-on sa ekonomiya sa syudad sa Davao:
Ang industriya sa mga hotels diin nagsumikad ang dakung bahin sa mga trabahante ug buhis sa dakbayan ang labing naapektohan og maayo sa pandemic.
Subay sa datos, pipila sa mga dagkung hotels nga kumpirmadong nanirado na sugod karong tuiga mao ang Marco Polo Hotel sa may Claveria, Acacia Hotel ug Grand Regal Hotel sa may Lanang ning atong dakbayan.
Segun ni Tecson, sa pag-undang sa operasyon sa mga hotels naigo usab ang mga restaurants, transportasyon, mga coffee shops ug uban pa hinungdan nga daghan sa mga residentes denhe nawad-an usab og panginabuhian kun source of income karong mga panahona.
Sa bulan sa Agosto pa lamang, milyones ka pesos na ang nawala sa turismo sa syudad nunot sa kanselasyon sa mga lokal ug mga langyaw’ng tourist bookings and accommodations nunot sa health crisis karon.
Dakong hagit sa buhatan sa turismo ang paghimo og mga pamaagi unsaon pagsustiner sa ilang operasyon taliwala sa dakung hagit dala sa virus sanglit gi-discourage na man ang non-essential nga mga lakaw ug gi-restrict ang movement sa ordinaryong katawhan.
Ang virus wala lamang usab ni-atraka ug niguba sa lokal nga ekonomiya: Giigo usab niini ang atong nasudnong pagkinabuhi sama sa pagdaut niini sa mga ekonomiya sa entero kalibutan.
Based on record, usa sa mga area nga labing apektado sa pandemic mao ang Southeast Asia diin daghang mga kumpaniya ug komersyo ang nanira.
Mga iladong dagkung brands ug kumpaniya gilayon nag-recall sa ilang mga trabahante kun mga ginsakpan gumikan kay naundang usab ang demand sa ilang mga consumer products.
Kun unsa man ugaling ang economic scenario nga naghulat kanato sa unahan, panahon ug Kahitas-an lamang gayud ang bugtong nasayud.
Ang labing importante, buhaton nato ang atong responsibilidad tupad sa mga inisyatibang gipatuman sa atong gobyerno.
RadyoMaN Joel Viray
