COVID-19 Testing Laboratory sang South Cotabato sarang nga makatest sang 90 ka tawo sa sulod sang isa ka adlaw.

Makatest sang yara sa 90 ka tawo sa sulod sang isa ka adlaw ang COVID-19 Testing Laboratory sang South Cotabato sa Dr. Arturo P. Pingoy Medical Center kag magagwa ang resulta sa sulod sang 45 minutos tubtob 1 ka oras, suno kay Provincial Health Officer Dr. Rogelio Aturdido Jr.
Paklaro man nga wala sang walk-in sa COVID-19 laboratory testing center tungod magaagi gid sa health protocol kag pagasal-on naman sang PHilhealth ang balayran sa testing laboratory.
Ini matapos nga tigayon na nga gin-isyuhan sang License to Operate sang Department of Health (DOH) kag Research Institute for Tropical Medicine ukon RITM ang nasambit nga pasilidad.
Samtang ang COVID 19 Xpert-Xpress SARS COV2 testing laboratory ang ginhatagan sang lisensya nga mag-operate umpisa Hunyo 4 tubtob Disyembre 31 subong nga tuig.
Suno kay South Cotabato Governor Reynaldo Tamayo Jr., ini ang pinakauna nga public-private partnership ukon PPP program para sa isa ka Covid Laboratory sa Pilipinas.
May-angot sini, hugot nila nga ginakalipay suno kay Governor Tamayo upod ang IPHO kag pamunuan sang Dr. Arturo Pingoy Medical Center tungod paagi sa pagbinuligay naangkon ang COVID laboratory agud mabuligan ang mga healthworkers nga mapadasig ang pagdiagnose sa mga pasyente nga posible infected sang coronavirus disease.