Davao City – Wala pay natala ang Davao City Health Office (CHO) nga severe side effects tungod sa Coronavirus Disease 2019 (COVID-19) vaccine partikular na kadtong mga nabakunahan na.
Kini ang gikumpirma ni Davao City Mayor Sara Duterte-Carpio sa pagsugod sa vaccination rollout sa dakbayan.
Matud sa Mayor, normal lang ang pagbaton og mga minor side effects sama sa pagpang hawoy sa muscle human nga mabakunahan.
“So far wala pa silay report (diri sa Davao) nga dunay naka experience og severe side effects (tungod sa bakuna), because usually pag mabakunahan kay naa man gyud kay ma-feel ana nga sakit like manghawoy imong muscle,” matud sa Mayor.
Segun sa Alkalde, kinahanglan nga mapaspasan ang pagbakuna labi na sa mga healthcare workers sulod sa mga ospital, ingon man sa mga laboratories and other allied medical institutions.
Giklaro usab ni Duterte-Carpio nga dili ginapugos nga magpabakuna sa mga empleyado sa lokal nga gobyerno, inay ginapasabot lamang kanila kung unsa ang bakuna ug ang vaccination.
“Wala ‘tay pagpamugos sa city government employees nga dapat magpabakuna. We will not do that. Our way of making people opt/choose nga magpabakuna is pag-explain sa ilaha kung unsa na ang bakuna, ang vaccination,” tataw ni Duterte-Carpio
RadyoMaN Kirby Manzon
