Davao City – Matawag nga counter-productive ang panic buying karon tungod sa Coronavirus Disease 2019 aapan dili kini maayo nga dagan sanglit puwedeng mahurot ug wala na’y mapalit ang mga kabus panahon sa mas malisud nga sitwasyon gumikan sa COVID-19 nga padayong misaka ang ihap sa mga natakbuyan ug sa mga lugar nga naigo sama sa Davao Region.
Sumala ni Multi-Sectoral Organization Focal Person Jess Pagaran, ang panic buying sa mga tawo karon resulta sa kulang o nanghinobrang impormasyon nga ilang nasagap mahitungod sa COVID-19 nga gideklara na sa World Health Organization nga usa na ka pandemic.
Kung napasabot lang og maayo sa katawhan ang mahitungod sa COVID-19, malikayan unta ang kaguliyang ug pagtarantar sa mga tawo sa ilang pag-adto sa mga grocery store ug mga supermarket aron mangompra sa ilang mga gikinahanglan.
Dili mabasol ang katawhan kung nganong nagpanic buying sila karon sanglit buot lang pod nila makasiguro nga dunay stock sa alcohol, hand sanitizer ug mga pagkaon sa ilang balay aron maka-survive sila sa pila ka semana o dili ba kaha tuig sa durasyon sa sa COVID-19.
Aron dili magbikil ug mag-away ang mga tawo gumikan sa pagkasigurista sa pagbaton og igong supply sa medical kit ug pagkaon,gikinahanglang ang gobyerno musulod na sa eksena aron masanta ang mga negosyante sa pagtago sa ilang baligyang produkto maingon man kadtong mga bentahoso sa panahon, matud ni Pagaran.
RadyoMaN Joel Viray
