Davao City – Gipagula na ngadto sa publiko ang composite sketch o facial identification sa usaka pasyenteng nagpositibo sa COVID-19 kinsa nisibat gikan sa quarantine facility nga iyang nahimutangan.
Ang subject giila ni Davao City Mayor Sara Duterte-Carpio nga usaka Arani Hajiba.
Nag-edad si Hajiba og 20-24 anyos ug residente sa Purok 4, Isla Verde, Brgy. 23-C, Davao City.
Aduna kiniy bukol sa wala nga bahin sa iyang liog.
“Duna ‘tay absconded nga isa, si Aranie Hajiba. Kini si Arani Hajiba, hangtod karon missing. Kagabii gisugdan na og cartographic sketch niya. Gina-improve karon sa computer ang pagdrawing sa iyahang nawong para mahatag nato sa public ang iyahang picture, para makareport ang makakita sa iyaha because hangtod karon wala pa niuli si Harani, wala pud siya nibalik sa iyahang quarantine facility,” matud niini.
Nangayo og tabang ang City Government of Davao sa publiko aron mapadali ang pagpanagita sa niikyas nga pasyente.
Kung kinsa may nakakakita, giawhag nga i-report gilayon kini kang Davao City Police Office City Director Police Col. Kirby John Kraft sa numerong 0917 700 2105 o kang Police Major Michael Uyanguren, Station Commander sa Sta. Ana PNP 0949 825 0579.
Pikas bahin, gisugilon ni DCPO City Director Police Col. Kirby John Kraft nga nagpabilin pa kining ‘missing’ sukad niadtong Sabado, May 9.
Gibutyag sa hepe nga mamahimo kining masilotan ilawom sa Section 9 sa Republic Act. No. 11332.
RadyoMaN Aimee Guinita
