Davao City – Batasan na sa mga Pilipino ang pakigdait sa isig kaingon ug dili makumpleto ang adlaw kon dili makasuroy sa silingan aron makigtabi ug makighisgot sa mga panghitabo sa palibot.
Apan gumikan sa coronavirus disease crisis, ang maong kultura ug kostumbre daw kilat nga nawala ug tanang mga Pilipino nagpondo na lamang sa ilang mga balay aron dili matakdan sa makamatay nga virus.
Matud ni Ateneo De Davao University (ADDU) political science professor Ramon Beleno III, maghatag og depression ug anxiety ngadto sa mga Pilipino ang presenteng sitwasyon diin daghang gibawal sama sa panilingan ingon man panagtapok-tapok kun mass or public gatherings.
Sumala ni Beleno, mas mugrabe pa ang depression ug anxiety nga masinati sa tawo hilabi na nga hangtod karon, daghan pa gihapon kanila wala pa makabalik sa naandang panarbaho.
Mas musamot og kahugno ang paglaum sa usa ka tawo hilabi na kon magkasakit og COVID-19 kay imbes nga suportahan, diskriminasyon naman hinoon ang iyang madawat gikan sa ubang tawo.
Mao kana ang ngil-ad nga epekto sa pandemic bisan og makonsidera nga ‘highly sociable people’ ang mga Pilipino apan tungod sa makamatay nga balatian, nagpatigbabaw karon ang pagka-isolationist niini, segun ni Beleno.
Tungod sa sitwasyon karon, mas dayag na hinoon nga ang mga Pilipino dili gayud diay andam sa bisan unsang krisis nga magapanghitabo, panapos sa professor.
RadyoMaN Joel Viray
