Davao City – Ginahulat na lamang sa City Government of Davao ang guidelines gikan sa Department of Health (DOH) alang sa home isolation human kini tugotan na dinhi sa syudad nga una nang gianunsyo ni Davao City Mayor Sara Duterte-Carpio.
Matud ni Dr. Michelle Schlosser, Davao City COVID-19 Task Force Spokesperson (sa interbyu sa city-owned radio) nga pipila sa pangandaman alang sa home isolation mao ang pagbaton og kaugalingon nga kwarto nga adunay CR (comfort room) sulod sa balay alang sa Coronavirus Disease 2019 (COVID-19) patient.
“We are waiting for the guidelines para ma-in place na nato ang pagbuhat nato sa activities sa home isolation. We have to have guidelines kay dili pasabot nga muingon ang tao nga gusto ko mag home isolate, pwede na,” segun ni Schlosser.
Giklaro ni Schlosser nga ang tugotan lamang usab sa home isolation mao kadtong mild ug asymptomatic kun walay simtomas sa COVID-19 samtang wala gi-allow sa home isolation ang moderate, severe ug critical sa COVID-19 base sa memorandum gikan sa Department of Interior and Local Government (DILG).
Wala usab gitugot sa home isolation kadtong persons with comorbidities kun adunay balatian ug kadtong vulnerable sectors sama sa mga senior citizen nga delikado ug risgo sa COVID-19.
RadyoMaN Kirby Manzon
