COVID TF: Sugyot nga pagwagtang sa RT-PCR test sa hospital admission tukion

Davao City – Hisgutan karon sa Davao City Coronavirus Disease 2019 (COVID-19) Task Force (TF) ang sugyot sa concern citizens nga pagwagtang sa RT-PCR test requirement una i-admit ang usa ka pasyente sa private ug public hospitals sa syudad sa Davao.

Matud ni Dr. Michelle Schlosser, tigpamaba sa Davao City COVID-19 TF (sa interbyu sa city-owned radio), ang pagwagtang sa RT-PCR test wala nakalatid sa Executive Order (EO) 11, Series of 2022 o ang Order Lifting All COVID-19 Restrictions in Davao City.

Gipasabot ni Schlosser ug personal usab niining panlantaw isip usa ka doktor nga risgo sa mga pasyente kung dili masiguro nga luwas sa COVID-19 ang i-admit nga pasyente sa hospital, luyo sa pagwagtang sa daghang COVID-19 restrictions sa syudad.

“Rest assured that I will help raise this concern sa atong COVID-19 Task Force kasi high-risk siya nga dili nato i-required og RT-PCR test ang mga patient for admission, because we will be mixing plain cases from possible COVID-19 cases,” sulti ni Schlosser.

Nasayrang mulo sa pipila ka Davaoeños ang gasto sa pagpa-RT-PCR test nga sagad rekisitos sa mga hospital sa dakbayan una tugotang ma-admit ang pasyente.

RadyoMaN Kirby Manzon