CPOC: Martial law lifting gidasonan

Davao City – Nipasa karon og usaka resolusyon ang Davao City Peace and Order Council (CPOC) nga bakwi-on na ang Martial Law declaration sa syudad sa Davao gumikan sa hapsay na nato nga sitwasyon karon.

Gikumpirma kini ni Public Safety and Security Command Center (PSSCC) head Benito De Leon atol sa gipahigayon nga iSpeak Forum ning dakbayan.

Matud ni De Leon, subay kini sa evaluation ug assessment sa Task Force Haribon diin na-establisar nga sa pagkakaron, wala nay direktang hulga sa seguridad sa Davao.


Dugang ni De Leon nga walay mahimong kabag-ohan sa seguridad karon sa Davao gumikan mentenahon lamang gihapon sa mga awtoridad ang ihap sa mga naka-deploy nila nga mga personahe.

Malaumon ang hepe sa PSSCC nga mas mudaghan pa ang mga turista ingon man business establishments dinhi gumikan sa kahusay ug kalinaw sa syudad.

Kahinumdoman nga mismong si City Mayor Sara Duterte-Carpio nipadangat sa iyang hangyo ngadto sa Malacañang nga tapuson na ang martial law implementation dinhi sa dakbayan.

Lantaw ni De Leon nga posibleng sa bulan sa Agosto ma-aprubahan na kini ni Pres. Rodrigo Duterte.

RadyoMaN Jason Amisola

Facebook Comments