Crime incidents sa syudad nagnubo

ILOILO CITY – Dako ang gin-nubo sang krimen sa syudad sang Iloilo sa period nga Hulyo 17-23 subong nga tuig kun ipaanggid sa amo man nga period sang nagligad nga tuig.

Base sa record sang Iloilo City Police Office nagnubo ang index, non-index crimes kag traffic incidents subong nga tuig.

Suno kay Mayor Jed Patrick Mabilog malipayun sya kay nagnubo ang crime incidents sa syudad kag ini nagakahulugan nga ang syudad padayun nga malinong kag liveable.


Ginapakita sang record nga ang crime incidents sugod Hulyo 17-23, 2016 may 40 ka index crimes nga natabu apang subong nga tuig sa amo man nga period nagdangat lamang sa 26.

Sa non-index crimes may 36 ka kaso sa Hulyo 17-23, 2017 samtang 55 ka non-index crime sa amo man nga period sang nagligad nga tuig.

Ang index crimes ginalakipan sang murder, homicide, physical injury, robbery, theft, carnapping kag cattle rustling samtang ang non-index crimes nagalakip sang paglapas sa mga special laws kag iban pa.

Sa bahin sang traffic incidents may 117 ka kaso sa Hulyo 17-23, 2017 nga mas manubo sa 133 ka kaso sang nagligad nga tuig sa amo man nga period.

Ginsiling ni ICPO Spoeksman Sheila Mae Sangrines nga bunga ini sang masami nga sinapol ni ICPO Dir. Sr. Supt. Remus Zacharias Canieso sa mga chiefs of police kag mas ginpasangkad nga police visibility.

Facebook Comments