Davao City – Gisubay sa Regional Crime Laboratory Office XI pinaagi sa PNP Automated Fingerprint Identifier System ang ilang nakuhang prints gikan sa napalgang gitagod-tagod nga patayng lawas sa babae nga gibilin sa Buhangin ug sa Bajada ning syudad.
Gibutyag karon ni RCLO Medico Legal Officer PCI Nolan Genova nga wala sa maong system ang biktima hinungdan nga mas lisod kining ma-identify.
Segun ni Genova nga gawas sa 5 feet nga height ang babae anaa sa pangedarong 20-25 anyos.
Missing ang ring finger sa biktima ug giingong gituyo usab kini sa pagputol.
Sa awtopsiya nigula nga Blunt Traumatic Injuries to the Head ang gikamatay sa biktima.
Nagpabilin gihapong unidentified ang biktima.
Sa pikas bahin mokabat sa upat na ka mga pamilya ang nidangop sa Buhangin PNP aron makita ang maong patayng lawas apan negatibo usab kini.
Gitataw ni Buhangin PNP station Commander PCI Jack Tilcag nga tanang pamilyang buot mu-claim sa maong patayng lawas angay mupailawom sa DNA test aron masigurado gayod nga ila kining kabanay.
Padayong panawagan sa PNP sa publiko nga makigkoordinar kanila kung aduna silay kasayuran o impormasyon sa kaso aron mahatagan ug hustisya ang biktima ug madakpan ang mga responsable sa krimen.
RadyoMaN Aimee Guinita
