Davao City – Gihatag karon ang tanang tabang gikan sa nasyunal ug lokal nga gobyerno alang ngadto sa mag-igsuong Nonoy kinsa mga biktima sa pagpanunggab sa ilang kaugalingong amahan.
Sa interbyu sa DXDC RMN Davao kang Island Garden City of Samal Mayor Al David Uy nga abagahon sa gobyerno ang tanang galastuon sa pagpahiluna sa patayng lawas sa tulo ka mga menor de edad ug hospital bill sa ilang kinamanghuran kinsa padayon pa karong ginatambalan sa Southern Philippines Medical Center.
“Wala na gyod silay problemahon sa funeral ug sa nahibiling anak nga youngest nga up to now naa pa sa ospital kay nagtinabangay naman ang office ni Secretary Bong Go ug ang local government para sa funeral ug galastuon sa ospital. Garantiya na sa local government na ang mag-shoulder sa tanang expenses,” matud sa alkalde.
Gilaraw sa LGU ug DSWD nga ipailawom sa psychosocial intervention ang inahan ug ang nahibiling anak kinsa anaa sa grabeng trauma human sa mangilngig nga insidente.
Naitok si Uy human nga masayri nga wala nagmahay ang suspek sa iyang gihimong krimen.
Gibutyag sa mayor nga adunay Moral Recovery Program ang lokal nga panggamhanan nga mamahimong kadangpan ilabina ngadto sa mga pamilyang nakasinati’g grabeng problema, depresyon ug uban pang mental health problems.
RadyoMaN Aimee Guinita
