Roxas City, Capiz- Ginsaysay sang suspek nga si Antonio Eduardo alyas “Tony Balila”, 67-anyos kun paano sini ginpatay kag paano ginhaboy ang lawas sang biktima nga si Antonio dela Rosa.
Sa eksklusibo nga interview sang DYVR sa suspek, ginsiling sini nga naghupot siya sang kaakig sa biktima rason nga nahimo ang amo nga krimen.
Gindugang sini, nagsugid sa iya ang asawa nga ini ang gin-abuso sang biktima.
Mas labi pa nga nagsingki ang nabatyagan niya nga kaakig sa tiun nga mag-agi ang biktima sa ila poluy-an kun sa diin ini ang nagayuhom-yuhom nga kasubong wala sang may natabo.
Suno kay Antonio Eduardo, Biernes sang udto nag-agi ang biktima sa ila poluy-an rason nga iya ini ginpahapit kag ginbalibad lamang nga may yara sang ginapa-obra sa iya balay. Ginpasulod niya ini kag likom sa ihibalo sang biktima, may yara na gali sang napreparar nga martilyo. Hinali niya ini nga ginlamposan sa ulo rason sang pagkatumba sang biktima kag ini ang ginbawian sang kabuhi.
Ginsulod niya sa sako ang bangkay sang biktima apang indi mag-igo gani nga nagkuha siya sang matalom nga sanduko kag gin-utod ang duha ka paa sang biktima. Ginbutang niya ini sa duha ka sako.
Sang pagka-aga na, nag-okopar ini sang motor kag nagpakuno-kuno nga magahaboy sang basura sa Brgy. sang Banica. Diri niya ginhaboy ang lawas sang biktima malapit sa dalan sa puno sang kahoy nga alipata.
Suno kay Antonio Eduardo, “Wala ko man ini mahimo kun wala man siya sang may ginhimo nga malain sa akon asawa”.
Matigdas ang pahayag sini nga wala niya ginahinulsolan ang iya ginhimo.
Sa subong, yara na nakahunong sa lock up cell sang Roxas City PNP ang nasambitan nga suspetsado kag anuman nga oras pasakaan sang kaso nga murder.
Samtang natalana man nga pagakuhaan sang pahayag ang pamilya sang biktima.
Note: ***(Ini ang solo lamang nga pahayag ukon alegasyon sang suspek)***
