General Santos City–Mi-ubos ug 46 percent ang krimen sa Gensan gikan Setyembre 16 ngadto na Oktubre 31 ning kasamtangang tuig kung itandi sa susamang period sa milabay’ng tuig.
Sumala kang Police Col. Gilberto Tuzon, City Director sa Gensan City Police Office nga anaa sa 242 ang gi-ubos nga krimen sa tibuok syudad. Apan, gi-angkon niya nga sa walo ka presinto sa kapulisan sa Gensan, ang Police Station 8 lang ang adunay pagsaka sa krimen kung asa sagad nga nahitabo mga homicide cases.
Samtang gibutyag ni Col. Tuzon nga sukad sa iyahang paglingkod, mukabat sa 57 na ka mga operasyon ang ilahang napahigayon kung asa 51 ang arestado ug napulo ang patay. Mokabat usab sa 44 ka mga illegal gambling operation ang nahimo sa GSCPO ug anaa sa 111 ang mga naresto.
Mibalor usab sa kapin 26 mil ang kantidad sa kwartang nakumpiska. Anaa man usab sa 83 ka mga top most wanted person ang nadakpan, samtang anaa sa 87 ang mga regular wanted person. Samtang 11 ka mga search warrant operation ang napahigayon ug tulo ang mga naaresto.(LVR)
