General Santos City–Giangkon ni Police Senior Superintendent Maximo Layugan, ang labaw sa Gensan City Police Office nga mitaas ang krimen sa dakbayan human nga gitanggal sa kapulisan ang operasyon batok illegal nga druga.
Gibutyag ni Layugan nga partikular nga mitaas ang kaso sa robbery ingon man ang pagpangawat, sa halos duha kabulan dihang gipa-undang ang “Oplan Tokhang”.
Dugang pa ni Col. Layugan nga apil sa mga misaka mao ang ihap sa mga batang sukarap o ang Children In Conflict With Law (CICL).
Busa dako ang iyahang panghinaut nga ilablik sa nasyunal ang operasyon batok druga sa kapulisan gumikan usa kini ka epektibong pamaagi aron makunhuran ang krimen.
Ang illegal nga druga gyud maoy ilahang ginatumbok nga nag-unang hinungdan sa pagtaas sa kriminalidad dili lang sa dakbayan kundili bisan na sa tibuok nasud.
Pagpaklaro man usab ni Layugan nga higayon nga ibalik ang operasyon batok druga, aduna nay mga pulis sa dakbayan nga masaligan nga anaa na naka-standby ug nagpaabot nalang sa mando nga ipakanaug sa PNP National Headquarters. (Lore Romualdo)
