Niubos matud pa ang ihap sa crime incident sa tibook Northern Mindanao.
Sa interview sa RMN Malaybalay ngadto kang Police Regional Officer 10 Regional Spokesperson Police Lt. Col. Mardy Hortillosa, gibutyag niini nga base sa ilang crime statistics nga gipagawas dili pa lamang dugay, niubos ngadto sa 12.09% ang crime incident nga natala gikan Enero hangtod Hunyo ning tuiga kung ikumpara sa susamang panahon kaniadtong nakalabay nga tuig.
Nagpasabot matud pa kini nga maayo ang dagan sa peace and order situation sa tibook rehiyon.
Nasayran nga gikalipay sa PNP 10 nga ikaduha ang rehiyon nga nikunhod ang krimen sa tibook Pilipinas ug number 1 sa entero Mindanao niadtong nakalabay nga tuig.
Karong tuiga aduna matud pay pag-ubos nga muabot ug halos 948 ka krimen.
Pinakataas nga ihap matud pa sa krimen gikan sa reckless imprudence resulting to homicide, physical injury ug damage to property nga nahitabo tungod sa disgrasya sa kadalanan.
Gidepensa ni Hortillosa nga dili na nila kini kontrolado tungod kay aduna pa gihapoy nga driver nga nagmaneho bisan lango sa ilimnong makahubog.
Tungod niini, aduna matud pay himoon nga lakang ang kapulisan aron maminusan ang mamatay tungod sa aksidente sa kadalanan.
Aduna matud pay kamanduan nga gipagawas si PRO 10 Regional Director Police BGen. Rafael Santiago Jr. nga nagmando nga tun-an kung unsay mahimo sa kapulisan aron masulbad ang mao nga problema.
Gikasubo usab sa PRO 10 nga sa crime rate nga 6,000 kapin karong tuiga, 2000 kapin niini tungod sa traffic accident.
