Davao City – Wala uyoni sa kapulisan ang mikalat karon nga impormasyon labot sa pagbaba sa crime rate sa Tagum City, Davao del Norte gumikan sa pag-apil sa katawhan diha sa investment schemes.
Sumala ni PRO 11 Regional Director Brig. Gen. Marcelo Morales nga walay korelasyon ang crime rate sa mga investment schemes nga naga operate sa usa ka syudad.
Gikanayon niini nga posibleng makadugang lang sa krimen ang maong scheme gumikan makadani kini sa usa ka tawo nga mobuhat og krimen ilabi na nga gina post online sa mga investors ang kwarta nga ilang payout.
Dinhi sa Davao region, adunay 10 ka mga investment schemes ang ilang padayon ginamonitor karon.
Matud ni Morales nga posible pang madugangan ang maong ihap sanglit nasuta nga pipila sa mga business permits nga gi-applyan sa maong institusyon sukwahi sa ilang ginabuhat.
Pagpasabot sa hepe sa PRO-XI nga tumong lamang nila nga pa-imbestigahan kini kung lehitimo ang pag operate sa maong mga establisemento alang sa usab sa proteksyon sa publiko.
Gani ginadasig nila ang mga ahensya sa gobyerno nga buhaton usab ang ilang parte.
Sa pagkakaron, wala pa gihapon pormal nga reklamo labot sa mga mi-ulbong investment schemes sa Rehiyon 11.
RadyoMaN Jason Amisola
