Gin-athag ni Capiz 2nd District Congressman Fredenil *Castro* , House *Majority Floor Leader* sang Kamara nga indi mapreso ang mga kabataan nga naghimo sang krimen.
Ini matapos pasado na sa 2nd reading sa plenaryo ang House Bill 8858 ukon ang pagpanubo sa minimum age of criminal liability (MACR) sa 12 anyos .
Suno kay Castro, ang nasambit nga hagna ang wala nagasilot , sa baylo nagaprotehir ini sa mga kabataan.
Sa idalom sang House Bill 8858 , ang mga bata nga naga-edad 12 anyos panubo ang ‘completely exempt from criminal responsibility.’
Samtang ang mga bata nga nakahimo sang krimen kag naga-edad sang masobra 12 anyos apang manubo sa 18 anyos ang indi otomatik nga presuhon sa karsel upod ang iban nga mga kriminal.
Suno kay Castro, ‘under exceptional circumstances’ lang nga mapreso ang bata ukon tumalagsahon nga sirkumstansya lang nga masilotan ang bata bangud i-implementar ang paghusga sa husgado.
Dugang pa niya nga lantawon anay kon ginkalipay sang bata ang paghimo sang krimen bangud kon indi niya hungod kag nahimo lang ini agud depensahan ang kaugalingon, indi masilutan ang bata.
Kon hungod naman kag ginakalipay sang bata ang paghimo sang krimen kag wala sang paghinulsol nga ginatawag ‘discernment’, ini na ang tion nga pasabton siya sa iya ginhimo.
Apang gin-athag ni Castro nga indi otomatik nga silutan ang bata bangud buligan ini sang estado sa pagpanguna snag Department of Social Welfare and Development ( DSWD) kag dal-on sa rehabilitation center kaangay sang Bahay Pagasa kon sa diin may intervention program nga ginpreparar sang Department of Social Welfare and Development ( DSWD) upod ang ginikanan kag medical experts angut sa pagahimuon sa pagreporma sang bata.
Kon luyag sang mga bata nga mangin mapuslanon sa tion nga makabalik na ang mga ini sa komunidad, mahimo ang mga ini magtuon sa technical training center sa bulig sang Technical Education and Skills Development Authority ( TESDA ) ukon sa agricultural training center.
Ginpahayag ni Castro nga kon makita nga nagreporma kag nagbag-o na ang bata, mahimo na ini ibalik sa sosyodad.
Apang kon may ginhimo pa gid nga krimen samtang yara sa training center kaangay sang pagpamuno kag wala gid snag reporma, ipatuman na ang sentensya sang layi kag ini na ang tion nga ipatawag sang husgado kag silutan.
Magapangatubang naman sang nagakaigo nga silot ang mga ginikanan ukon ang mga sindikato nga nagagamit sa mga kabataan sa paghimo sang krimen .
Ginahingyo naman ni Castro ang mga nagakontra sa nasambit nga hagna nga hibaluon ang kaundan sang layi kag indi paghiluan ang paminsaron sang mga pumuluyo.
Angut naman sa nagakwestyon kon may nagakaigo nga training centers sa pungsod, gin-athag ni Castro nga nagahimo lamang sila sang layi kag ang ehekutibo ang maga-implementar sang layi.
Bangud sini, ginpahayag ni Castro nga kon seryoso ang administrasyon sa katuyuan nga maprotehiran ang mga kabataan, magahimo ang mga ini sang tikang agud ma-implementar ang layi.
(photo from web)
