Syudad sang Iloilo-Magatukod si Mayor Jose Espinosa III sang Crisis Committee .
Suno kay Mayor Espinosa mangin papel sang committee ang magtuon kun ano ang mahimo sang syudad kun may matabo nga power crisis bunga sang pagbag-o sang power distributor sa syudad.
Pagabug-usan ang committee sang nagkalainlain nga departamento sang syudad.
“Sila ang matuon kun ano ang atun himuon kun may power crisis. Masubmit sila sa akon sang ila rekumendasyon,” ang pahayag ni Espinosa.
Nahibaluan nga gin-imbitar sang alkalde si Sen. Grace Poe nga magbisita sa syudd agud makapakigsugilanon sa mga negosyante kag makuha ang pasalig nga wala sang matabo nga power crisis sa syudad.
Pahayag sang alkalde nagpalapit na sa iya ang mga call center companies kag nagpahayag sang kabalaka kun may matabu nga power interruption.
“Isa gid sa mga nagakabalaka ang atun call center companies. Gusto nila mapasigurado naton nga wala sang matabu nga power crisis kun magbag-o ang ppower distributor,” dugang pa sang alkalde.
Nahibaluan nga aprobado na sa Kamara kag pending sa committee level ang franchise bill sang MORE Power Inc. ang bag-o nga power company nga gusto makuha ang power distribution gikan sa Panay Electric Company nga pending pa ang franchise renewal sa committee level sang kamara.
