Si Regional Manager Bonifacio Pales na mismo sa PCIC kon Philippine Crop Insurance Corporation ang nag-awhag sa mga wala pa nakapalista nga mga kwalipikadong mag-uuma og mananagat sa Sarangani Province nga duolon na ang pito (7) ka mga Municipal Agriculture Office aron maapil pohon sa listahan nga makadawat og mga benipisyo ingkaso dili magmalampuson sa gipangtanum og sa pagpanagat, hilabi na nga nabatyagan na ang epekto sa El Nino phenomenon.
Sa kamanduan ni Pangulong Rodrigo Duterte, muhatag ang PCIC og insurance benefits sa crop insurance og non-crop agricultural assets kung maigo sa kalamidad, sama sa pagbaha, landslide, bagyo, apil na ang pag-atake sa mga mananap og insekto.
Nagpasalamat na lamang si Regional Manager Pales ngadto nila Governor Steve Chiongbian Solon sa paghatag og lawak sa iyang opisina sulod sa compound sa Kapitolyo sa Sarangani aron maduol dayon sila nga dili na kinahanglan nga muadto pa sa ilang regional office sa Koronadal City. Ang PCIC usa ka GOCC kon government owned and controlled corporation ilalum sa Department of Agriculture.
Sa talaan sa PCIC, atong nakalabay nga tuig 2018, adunay kinatibuk-ang P24.8 Milyones ka pesos nga balor sa insurance claims ang ilang nahatag sa 2,014 kabuok mag-uuma sa Sarangani Province nga na-apektuhan sa natural calamity. Og hangtud kagahapong adlawa, may nabayaran sila nga P2.8 Milyones ka pesos gikan atong bulan sa Enero sa 162 kabuok mag-uuma nga apektado sa Sarangani gihapon.
