General Santos City—Ginahuman nalang matud pa karon sa opisina sa Civil Security Unit (CSU) ang imbistigasyon nila kabahin sa alegasyon sa usa ka myembro sa CSU nga na assign sa City Engineering’s Office nga nagpagawas ug mga ligid ang usa ka job order employee sa motor pool nga si Antonio Provido niadtong milabay nga Pebrero 3, 2018, adlaw nga sabado alas 9.00 ang takna sa buntag nga wala mihatag ug trip ticket kanila.
Sumala pa ni Col. Danilo Ferrer ang labaw sa CSU sa dakbayan nga gina human na nila karon ang maong imbistigasyon ug gikatakda nila kining ipasa ngadto sa City Legal Office alang sa legal nga aksyon kabahin niini.
Samtang gi angkon usab ni col. Ferrer nga wala gayud silay konkreto nga ebidensya sama nalang sa picture tungod kay wala nakuhaan ug picture sa CSU nga nakakita sa pagpagawas ug ligid human nga paspas matud pa ang dagan sa sakyanan pagawas sa motor pool apan gibarugan matud pa sa CSU nga nakakita nga duna gyoy mga ligid nga gipagwas si Antonio Provido sa maong lugar.
Nasayran nga base sa regulasyon sa motor pool kinahanglan gyud ug trip ticket matag gawas sa driver ug kinahanglan ila kining ihatag ngadto sa on Duty nga CSU apan ang nahitabo walay trip ticket nga gihatag inay diretso lang gipagwas ni Provido ang sakyanan nga dunay kargang mga ligid. (Dave Silagan)
