Davao City – Magdeploy ang City Transport and Traffic Management Office (CTTMO) og 375 ka mga personahe atol sa umaabot nga 33rd Kadayawan Festival dinhi sa dakbayan sa Davao.
Sumala ni CTTMO chief Dionisio Abude, lakip na dinhi ang engineering personnels ug mga maghakot sa mga railing nga gamiton sa pagsaulog sa usa sa pinakadako nga selebrasyon.
Segun ni Abude, adunay 20 ka mga intersections ang gipasirad-an nga gamiton sa Indak-Indak ug Pamulak sa Kadayawan diin susama lang sa milabay na tuig ang ruta niini.
“Gikan sa Roxas then mu-left turn sa CM Recto, right turn sa Bonifacio then mudiretso sa Pelayo ug mu left turn sa San Pedro diretso sa Rizal Park kung asa sila mag end so sa Indak-indak naa tay tulo ka mga street showdown diha sa crossing Roxas ug CM Recto Streets, kanto Bonifacio ug last sa Rizal Park,” tataw ni Abude.
Samtang giklaro sa opisyal nga dili i-implementar ang Jay-Walking Ordinance sa mga lugar kung asa ginapahigayon ang aktibidad sa Indak-idak ug Pamulak aron mas mamahimong lingaw ang mga Dabawenyo ilabi na ang mga turista ug bisita sa selebrasyon sa Kadayawan Festival.
RadyoMaN Jason Amisola
