Amedienate del grande avenida ya abaja y ya hace sumi conel entero distrito de Vitali sequiendo con el mal tiempo, con un persona ya picha el venenoso clase de culebra mientras ta precura le salva consu familia.
Si Consejal Mike Alavar quien el una oficial del ciudad ya llega na lugar ya puede conose con el victima como si Jose Marie Bartolome, del mencionao lugar.
Asegun con Alavar el tiempo que ele mismo ta asisti con el maga afectao familia, ya puede le mira con el victima conquien dayun ya pone adentro del ambulancia y ya lleva corre na hospital.
Mientrastanto, monton del maga familia el ya evacua desde na diila cada-y-cual casa mientras el losdemas nohay puede sale na diila residencia porcausa con el grande avenida que ya tapa hasta con el maga calsada.
Porcausa mismo el escuela de elementaria y high school sumido na aguay avenida, ya usa ya lang temporariamente con el iglesia como el evacuation center para con el maga afectao familia.
Ya llega tambien el vice alcalde Cesar Ituralde, canda consejal Jimmy Villaflores y Teodyver Arquiza na lugar y ya continua asisti con el maga victima del avenida.
