Sarangani Province–Karon ng adlawa, adlaw nga Hwebes, Marso 5, ang culmination program pagtapos sa usa (1) ka semana nga labing una nga pagsaulog sa anibersaryo sa Sarangani Bay isip usa ka protected seascape.
Ensakto ika-baynte kwatro (24) katuig karong adlawa gipirmahan ni Pangulong Fidel Valdez Ramos ang Proclamation No. 756, Marso 5 tuig 1996, nag-establisar sa Sarangani Bay isip protected seascape. Nigawas ang maong proklamasyon gikan sa presidente sa Pilipinas sa pagpaningkamot usab sa mga visionary leader nga sila the late Congressman James Chiongbian ug Gobernadora Priscilla Chiongbian.
Segun ni Joy Ologuin, ang PASu kon protected area superintendent ilalum sa DENR Region 12 nga maoy secretariat sa PAMB (pam-bi) o Protected Area Management Board nga nag-atiman sa Sarangani Bay, nahimong mabulukon matud pa ang pinakauna nga anibersaryo sa Sarangani Bay Protected Area.
Nagmalampuson nga natigayon ang Underwater Photography, Trash to Art, Mass Dance Competition, Environmental Forum, Bay Enforcement Summit ug ang Marine Life Exhibit-Treasures of Sarangani Bay. Personal pa nga nibisita si DENR Assistant Secretary Metodio Turbella.
Alas 6am karong buntag mao na ang simultaneous Bay-wide Coastal Cleanup pagpanglimpyo sa tibuok Sarangani Bay gilangkuban sa saysentay-otso (68) kabuok coastal barangays. Unyang alas 2pm sa hapon mahitabo ang Search for The Ambassadress of Sarangani Bay Protected Seascape beauty pageant sulod kana sa Veranza Mall atbang sa KCC Gensan. Ang ma-koronahan ang magsilbing beauty icon nga maoy muhatag og promosyon ug kaabag sa pag-amping sa bahandi sa Sarangani Bay. Ug pagka-alas 5pm karong hapon, musunod ang culmination program.
Gibutyag ni PASu Ologuin nga puno sa bahandi sa kinaiyahan ang Sarangani Bay. Bisan si Maam Michelle Lopez Solon, kapikas sa kinabuhi ni Governor Steve Chiongbian Solon, ang namahayag nga ang tanan ang dapat magkahiusa sa pag-amuma apil na ang mga kabatan-unan aron makagamit pa ang musunod nga henerasyon.
Gipaklaro ni PASu Ologiun nga adunay multi-use zone ug strict protection zone ang Sarangani Bay subay sa balaod sa ENIPAS Law. Kadtong mga beach resort nga adunay mangrove sa ilang area ang gitugutan kini sa DENR-PAMB, mu-apply lang og Special Use Agreement in Protected Area o SAPA dungan sa pag-submitar og uban pang mga dokyumento ug rekositos, sama sa comprehensive development and management plan plus rehabilitation plan, ECC ug ang pagbayad sa tinuig nga annual development fees, apan hugot gibawalan ang pagpamutol sa mga mangrove.
Gidasig sa PAMB ang mga beach resort owner nga dugangan pa hinuon nila ang pagtanum og mga bakawan sa ilang area aron mudaghan. May nakasuhan na matud pa sila sa Alabel tungod nahilabtan ang mangrove, bisan ang DPWH ang nakabayad og minilyon ka pesos tungod natandog ang mangrove area sa Glan gumikan sa ilang proyekto nga riverbank stabilization.
Samtang, gipaniguro ni Governor Solon ka-alayon si Gensan Mayor Ronnel Rivera, nga pahugtan pa ang pagpatuman sa solid waste management ug mga sanitary landfill sa Sarangani Province katugbang ang pito (7) ka mga mayor ug mga barangay kapitanes, ug ang mga lokal sanggunian sa ilang ordinansa, apil na ang mga law enforcement agency. Naka-monitor pud sa kanunay ang ECPC Sarangani sa mga sewerage treatment facility ug nagapahigayon sila og regular water quality sampling sa Sarangani Bay aron masuta kung nagpabilin ba kining limpyo.
Anaa usab ang Sarangani Provincial Health Office padayong nakatutok sa programa nga ZOD o zero open defecation masiguro nga adunay pansayan/comfort room ang matag panimalay hilabi na sa mga kabaybayunan, sa pag-ayuda kana ni Vice Governor Elmer De Peralta ug sa tanang board member ug nila Senador Manny ug Congressman Ruel Pacquiao.
