Pagadian City – Gipatin-aw ni Pagadian City Councilor Ricardo Alajenio nga bisan og napasa na sa ikatulo ug katapusang pagabasa sa Sangguniang Panlungsod ang ordinansa nga mopa-undang sa implementasyon sa Curfew hours dili pa kini epektibo karun dayon kay kinahanglan pa una kini nga mapatik sa mantalaan.
Sa interview sa RMN Pagadian kang Alajenio ang naghupot sa komitiba sa Peace and Order gibutyag niini nga dihang mapatik na sa mantalaan ang napasa nga ordinansa ipangapud-apod gilayon kini sa ahensya nga maoy gisangunan pag-patuman sa balaod.
Gihimong basehan sa konseho ang pamahayag sa kapulisan ug kasundaluhan nga walay hulga ang syudad rason nga dili angay ipatuman ang curfew ordinansa kay makaapekto usab kini sa ekonomiya sa dakbayan.
Apan subay sa provision sa ordinansa numero 067 gimanduan gihapon ang kapulisan sa pagsita sa mga menor de edad nga masakpang naa sa sentrong bahin ning syudad panahon sa lawom nga kagabihion.
