Estancia, Iloilo – Isa ka kanding, ginbun-ag nga isa lamang ang mata sa Brgy. Tacbuyan, Estancia, Iloilo. Suno kay Remalyn Arim nga amo ang nag-upload sang laragway, ginkatingala sang taga-alaga sini sang ginbun-ag ang kanding nga may pinasahi nga hitsura.
Makita man sa laragway sang kanding nga pinasahi ini, bangud ang naga-isahanon nga mata, nagkadto sa dapat pahamtangan sang iya ilong. Ginpahayag dugang ni Remalyn nga napatay man gilayon pagkahapon ang amo nga kanding bangud sa kabudlay sa pagginhawa bangud wala ini sang ilong.
Nahibaluan nga sadtong Mayo tuig 2017 sa Assam, India may ginbun-ag man nga isa ka kanding nga naga-isahanon ang mata kag nangin viral ini sa internet kag social media, apang kapareho sang kanding sa Estancia, Iloilo, ginbawian man ini sang kabuhi.
Natingala man bala kamo sa tinuga nga ini mga kasama?
