Davao City – Hugot nga gipatuman karon sa Regional Agricultural and Fisheries Section (RAFIS) sa Department of Agriculture (DA-XI) ang gitawag nga ‘1-7-10’ protocol didto sa lungsod sa Don Marcelino, Davao Occidental aron dili na mokuyanap pa sa kasikbit nga mga lugar sa rehiyon ang African Swine Fever (ASF) nga miigo sa maong lungsod.
Segun ni DA-XI RAFIS Chief Noel Provido, subay kini sa lockdown protocol diin ang mga baboy positibo man o negatibo sa ASF, dili na puwedeng ibaligya pa ug dili na puwedeng ibiyahe pa pagawas sa lungsod silbing depensa sa pagkaylap niini.
Ang naasoyng protocol subay sa international lockdown standard sa mga lugar nga infected sa ASF diin ang mga baboy sulod sa usaka kilometro ipailawom sa ‘depopulation thru culling.’
Gibutyag ni Provido nga tumong ning maong lakang mao ang pagseguro nga wala nay baboy nga positibo sa ASF gikan sa usa ka kilometro diin ang bantayan nga simptomas mao ang pagluya, pagsip-on ug wala nay gana mukaon pa niini.
Giingon ni Provido nga bayran sa gobyerno ang mga tag-iya og baboy sa kantidad nga P5,000 matag ulo diin ang bugtong himoon lamang mao nga ipatala kun magpalista sa barangay aron mabayran.
Sa usaka media interview, gisugilon ni Agriculture Secretary William Dar nga malagmit nakuha ang maong virus sa karneng naggikan sa kaulohang Manila nga nahidangat kun na-transport sa lalawigan.
Hinoon, luwas kan-on ang mga karneng baboy sa rehiyon ilabi na sa dakbayan apan hangyo ni Provido sa publiko nga dili pakan-on og lamaw ang ilang mga baboy gumikan sa posibilidad nga basin ma-infect kini ug lagmit matakdan na hinoon sa virus ang ilang mga binuhing baboy.
RadyoMan Joel Viray
