Davao City – Pipila na ka mga farmers nga apektado sa African Swine Fever (ASF) dinhi sa Rehiyon XI ang nahatagan na og ayudang pinansyal sa Department of Agriculture (DA).
Sa interbyu sa DXDC RMN Davao kang Noel Provido, Spokesperson DA-XI, gibutyag niini nga nagpadayon karon ang ilang pag-release sa first tranche nga adunay kinatibuk-ang P103.9 milyon nga budget isip bayad sa 20, 793 ka mga baboy nga na-depopulate nga gilangkuban sa 5,213 farmers.
“Mga 50% pa ang atong nahatag. Next week magpadayon napud ang team sa pagpanghatag sa ilaha,” saysay ni Provido.
Matud ni Provido, gina-check usab nila ang ilang record una mag-release aron malikayan nga madoble ang ayuda nga madawat.
Dugang niini, nag-require usab sila og Special Power of Attorney (SPA) ugaling adunay mga magpadala lamang og representative nga mokuha sa ayuda ugaling dili sila personal nga makaadto gumikan usab sa sitwasyon karon sa COVID-19 (Coronavirus Disease 2019) pandemic.
RadyoMaN Kirby Manzon
