Sa interbyu sa DXDC RMN Davao kang Belinda Petravicius, 36 anyos, mag pito (7) ka tuig nang minyo ni Simonas Petravicius, 39 anyos, usa ka Lithuanian, gisaysay niini nga una pa man nahitabo ang full-scale invasion sa Russia, nagpahibalo nang daan ang iyang bana nga andam kining mag-volunteer ugaling adunay giyerang mahitabo.
Gibutyag ni Belinda nga matud sa iyang bana, pila usab ka tuig nga nasakop kaniadto sa Russia ang Lithuania diin hurot nga namatay ang iyang ancestor nga mga tribu sa Samogitian.
“Pag-istorya namo via messenger, niistorya siya. Ana lang siya nga, sorry kung dili gyud ‘ni moundang, mulakaw gyud siya kay muadto gyud siya, mutabang gyud siya. Reaksyon nako, syempre naglisod. Syempre, nalibog ko nga naa gyud diay ingon ana tao nga ingon ana ka patriot nga bisa’g ang own family niya pwede niya i-sacrifice para lang sa imuhang bansa. All for the love of the country,” saysay niini.
Gisulti sa iyang bana, dili niini maantos nga dili mutabang sa apektadong mga indibidwal sa Ukraine diin bisan mga menor de edad mibarog na usab aron depensahan ang ilang nasud. Ang Lithuania tapad ra sa nasud Belarus nga border ra usab Russia ug Ukraine.
“Even kids 15 years old are defending Kyiv. So how can I sit in chair and watch in TV how those kids are killed. They even didn’t start to live and they are going to die, for their land, families. I’m sorry but you know me. If I said, I’ll do. That’s what it means to be man, keep your word,” mensahe sa iyang bana kaniya.
Naglaum karon ang Dabawenya nga ma-undang na ang giyera sa maong duha ka nasud diin matud sa usa ka analyst nga si Professor Clarita Carlos sa interbyu sa DXDC 621 RMN Davao, nga dili lang Pilipinas o ang Asya ang apektado sa pag-invade sa Russia ngadto sa Ukraine kundi ang tibuok kalibutan.
RadyoMaN Kirby Manzon
