Dabawenyo suportado ang giduso nga bereavement leave benefit

Davao City – Dako og ikatabang alang sa usa ka Bulawanong Dabawenyo nga si Rochelyn Dibdib, taga Monkayo, Davao de Oro ang sugyot balaodnon nga usa ka full-paid week-long nga Bereavement Leave Benefits.

Kini subay sa House Bill No. 4340 ni Quezon City Representative Marvin Rillo diin sakop niini ang private ug public sectors.

Sa interbyu sa DXDC RMN Davao kang Rochelyn, ang maong sugyot balaodon makatabang aron dili na mamahimong problema sa usa ka empleyado ang iyang sweldo samtang naka-leave kini samtang anaa sa kasub-anan.

“Mas nindot gyud ‘to nga naka-focus ka. Ma-concentrate nimo imong trabaho kung humana imong pagluksa. Mas nindot ‘to unya naa pud kay sweldo. Dili pud ka mabalaka nga nag-mourn ka unya after mag-mourn ka, wala pud kay sweldohon kay naka-leave ra diay ka without pay,” saysay niini.

Ilawom sa sugyot balaodnon, entitled sa Bereavement Leave ang usa ka empleyado nga namatyan og asawa, ginikanan, anak, igsoon, half o full blood man. Dili usab kini pwede nga ikaltas sa kasamtangang leave nga gihatag sa balaod.

Ang employer nga mapakyas paghatag sa Bereavement Leave, mamahimong mag-atubang og silot nga pagkapriso og 30 ka adlaw o multa nga P20,000.

RadyoMaN Kirby Manzon