TACLOBAN CITY – Ginrereklamo han pira nga empleyado han Tacloban City Hall an dako nga iban han ira annual clothing allowance nga nagkakantidad 5, 000 pesos.
Ini daw nga 5, 000 pesos in diri mismo iginhahatag ha ira kundi deretso nga iginpapalit han tela han ira uniporme.
Sumala han interview han RMN han usa nga empleyado nga igintago namon ha ngaran nga Michelle, ginpupugos daw hira nga 4 ka set hiton tela han uniporme han ira kukuhaon o papaliton.
“It amon la hini dinhi, diri man kami nasiring nga diri kami mag-uuniform, it amon la nga syempre dapat may masalin pa nga para pagpatahi, pagpalit hin igpapadis nga sapatos. Diri kay pipiriton kami nga upat ka set iton kukuhaon, depende hit sizes. Mayada didi nasiring nga an usa ka set tag 1.5k, 1.9k, 1.8k, kun amo ito pira naman la ito it masasalin.”
Mayada daw uniform committee nga ginpili hi Tacloban City Mayor Cristina Romualdez nga ansya iton mag-aasikaso hini.
Karuyag han pira nga empleyado han Tacloban City Hall nga diri an Divine Mercy Multi-Purpose Cooperative la iton magbuot han pagpalit hiton tela han ira uniporme kay diri man daw hira tanan nga empleyado in myembro hini nga kooperatiba.
Hangyo nira ha gintutuinan, igpailarom ha public bidding ini.
Ha interview pa liwat han RMN ha usa nga empleyado han City Hall nga kun mahihimo ighatag nala daw ha ira an 5, 000 pesos kay total, ira man daw ito.
“It amon la gusto matabo para ha mga empleyado hito nga clothing allowance, sana ig-release iton 5, 000 pesos ha amon kay para kami iton amu nga pumalit. Para kun pagka-lunes mag-uuniform kami, mag-uuniform kami diri kami pagbut-an kun hain kami mapalit.”
Ginkuha namon an side han Tacloban City Administration, sumala kan Antonio Cabunducan hiya iton admin officer, diri daw cash iton clothing allowance han mga empleyado.
“Kakalruhon ko la nga iton aton clothing allowance diri ito hiya cash. So far, waray pa ako hito makakarawat hin reklamo. Kun mayada man gud ma-insist nga mareklamo, ig-chachallenge ko hiya pakadto ha gawas ha tindahan, makaagi ka ngani hin presyo nga huruhamubo, tagi ako hin qoutation kay kaklaruhon ta ito.”
Hangyo naman han RMN ha mga gintutuinan ngan ha clothing commitee han City Hall nga maging tangkod ha iyo serbisyo kay napeperwisyo iton mga empleyado.
