General Santos City—Lima ka mga tawo apil na ang duha ka minor de edad ang nadakpan sa gihimong buybust operation sa Police Station 4 sa pakig-alayon sa PDEA Regional Office 12 sa may Dacvill, Phase 2, Barangay Mabuhay, Gensan alas 10:00 pasado ang takna kagabie, June 27, 2018.
Mga suspek giilang silang si Teodorico Luzon, 25 anyos kansa maoy target sa buy-bust operation, Leomer Desitora, 24 anyos, Jeferson Painitan, 21 anyos, alias Jorge, 16 anyos ug alias Manny, 16 anyos, pulos nga construction worker ug residenti sa maong barangay.
Napalitan ang suspek nga si Luzon ug (1) ka sachet sa gituohang shabu, samtang nakuhaan usab kini ug lain pang usa ka dakong pakete ug duha ka gamayng pakete sa gituohang iligal nga droga.
Samtang mga kaubanan niini ang nakuhaan usab ug tig usa ka pakete sa shabu mao nga giapil sila ug dakop.
Hugtanon sab nga gihimakak sa mga suspek nga ilaha ang shabu nga gipresentar sa kapulisan. Aligasyon sa mga suspek nga igo ra silang nag-inum atubangan sa balay ni Luzon apan natingala nalang sila dihang sila gipangdakop.
Kasong kalapasan sa RA 9165 ang gikatakdang atubangon sa lima ka mga suspetsado.
