General Santos City—Sikop ang usa ka amahan kansa milugos sa tulo niya ka mga anak human misumbong sa kwerpo sa kapulisan ang mga kabanay niini dihang nabisto ang ginahimo niining pag puli-puli ug lugos sa iyang mga anak.
Alas 4:30 ang takna kaganinang kabuntagon dihang gisikop ang suspek nga si Alias Welterio, 41 anyos, residenti sa Block 10, Barangay Fatima, Gensan.
Sa inisyal nga imbistigasyon sa kapulisan nasuta nga una nang misumbong sa kapulisan ang 19 anyos, 14 ug 13 anyos nga anak sa suspek ngadto sa ilang iyaan bahin sa ginahimo sa ilang amahan ngadto kanila.
Subay sa sumbong sa mga biktima nga tulo na ka higayon nga gihimo sa ilang amahan ang pag-among among ngadto kanila. Matag mahubog matud pa kini sila hilabsan sa nahisgutan.
Samtang subay sa pahayag sa 19 anyos nga biktima nga dugay nang ginahimo sa iyang amahan ang pag-among among kaniya bisan niadto pang sila didto pa nagpuyo sa kauluhang Manila.
Pag abot dinhi sa Gensan gihilabtan na usab ang iyang duha ka mga igsuyon ug pinakauwahing higayon nga gilugos sa suspek ang usa sa iyang manghod kagabie dihang kini nahubog.
Tungod niini mireport ang iyang iyaan ngadto sa kapulisan nga miresulta sa pagkasikop sa suspek.
Sa pakighinabi sa RMN Gensan News Team ngadto sa suspek nga si Welterio iyang giangkon nga iya gyud nahilabtan ang iyang mga anak. Sa karon balhog na sa silda sa Police Station 7 ang suspetsadong amahan ug gikatakda kining kasuhan karong adlawng Lunes.
