General Santos City—Balhog karon sa silda sa Police Station 3 ang usa ka Slovanian National kansa misuway ug sibat sa iyang bayranan sa gipuy-an niining Inn nga nahimutang sa national Highway, Barangay Lagao, Gensan.
Una nang mireklamo sa buhatan sa Police Station 3 ang usa ka Francis Denoga, 45 anyos, nanag-iya sa La Mirada Inn nga nahimutang sa Purok 15, Barangay Lagao aron ireklamo ug ipadakop ang iyang kleyante nga giilang si David Fifer, Slovenian National nga taga UE Maribor human nga misuway ug sibat ang iyang bayranan nga mikabat sa P18,100.00.
Subay sa sumbong sa reklamante nga alas 3:00 sa hapon, kagahapong adlawa, mao pay pag-abot niini sa Inn nga gipanag-iyahan, iyang nakit-an ang Slovenian national nga nagdali-dali bitbit ang iyang mga gamit.
Nasayran nga mirenta ug lawak sa maong Inn si Fifer sukad niadtong July 23, 2018 hangtud kagahapong adlawa, una na usab nga misaad ang nasangpit nga mubayad kagahapon apan naabtan nalang sa tag-iya ang plano niini untang pagsibat.
Tungod niini ilang gihold ang nasangpit ug giturn-over sa kapulisan. Dihang gipangitaan ug dukumento nasuta nga overstaying na ang nasangpit dinhi sa Gensan human nga na-expire na ang iyang mga dukumento.
Sa karon ang langyaw balhog sa silda sa Lagao PNP ug gikatakda na kining iturn-over sa Bureau of Immigration.
