Delaware – Ginlubong na ang lima ka membro sang pamilya nga Pinoy nga napatay sa car crash sa Townsend, Delaware sang nakaligad nga Hulyo 6, 2018.
Napuno sang emosyon halin sa pamilya kag mga kakilala ang pagdul-ong sa kataposan nga palahuwayan sa mag-amay nga sanday Audie Trinidad kag mga anak sini nga sanday Kaitlyn, Danna, kag kapid nga sanday Melissa kag Allison.
Sa madumdoman nga pauli na ang magpamilya halin sa bakasyon sang nakaligad nga Hulyo 6 sang natabo ang insidente.
Sa report sang Delaware State Police – natabo ang aksidente sa bahin sang state route 1 Highway sa Noxontown Road. Halin sa southbound, ginasiling nga naka-abot sa northbound lane ang isa ka Ford f-350 nga nabunggo sa Mercury Sable car nga amo naman ang nagbunggo sa Toyota Sienna van nga ginasakyan sang mga biktima.
Sa amo nga insidente, solo nga nakasalbar ang iloy sang mga ini nga si Mary Rose Ballocanag Trinidad, 53-anyos nga ginbulong sa Christiana Hospital.
Samtang ang driver sang pick-up truck, nga 44-anyos nga si Alvin Hubbard ang gin-release na sa kustodiya sang mga kapulisan kag wala pa nasapasakaan sang kaso tubtob sa subong nga mga tinion.
Panawagan subong ni Mary Rose, pamilya kag mga co-workers ni Audie sa US Postal Service nga mapasabat ang suspek nga si Hubbard kag mahatagan sang hustisya ang kamatayon sang mga biktima.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
