Iloilo City- Masuwerte nga nakaluwas ang isa ka babaye nga tumandok sang Poblacion Concepcion, Iloilo sa tuyo nga pag-abduct sa iya sang wala makilala nga suspek kagab-i.
Halin sa banwa sang Concepcion ang biktima kag nagpanaug sa Tagbak Terminal sa distrito sang Jaro kag nagsakay sa Jaro Liko nga Jeep apang nagtalang ini kabangdanan nagpanaug siya sa area sang Bankers Village.
Suno sa panaysayon sang biktima nga nagpamangkot siya sa lalaki nga nakamotorsiklo kon diin ang San Agustin sa City proper kag ginsabat siya sini nga sekyu ini sang San Ag kag maga-duty na kag nagtanyag na lamang nga idul-ong siya sini.
Bangud sini, naengganyo man ang biktima kag nagsalig.
Una nagpatughong sa Caltex gas station ang suspek kag sang ulihi natalupangdan sini nga malawig na ang ila nabiyahe kag tuman na ka layo ang ila nalab-otan.
Nahibalu-an, nag-agi ang motorsiklo sa circumferential road lapus sa radial road kag nagliko pawala sa ubos sang tulay sa area sang Zarraga.
Bangud sini, nakasat-om ang babaye nga lain na ang tuyo sang lalaki kabangdanan nga naglumpat ini sa motorsiklo sang hana na ini magdulog sa lugar nga wala sang pamalay, napalibotan sang kakahoyan kag nagdalagan sa diin nakapangayo sang bulig sa duha ka tigulang nga nagabantay sa tyangge.
Nahibaluan na lamang nga sa Barangay Bitaog, Sta. Barbara, Iloilo na ang nabiyahe nila kon sa diin siya naglumpat.
Gilayon ginkadto-an sang Sta Barbara PNP ang biktima sa brgy. Bitaog kag ginturn-over sa Jaro PNP.
Nagpadulong diri sa siyudad ang natungdan nga babaye agud kuntani mag-attend sa debut sang iya pakaisa sa Emilion bilang kabahin sang 18 roses apang bangud sa natabu, wala na ini makatambung sa nasambit nga party.
Facebook Comments
