Nasapon sa mga jail officers sa Bureau of Jail Management and Penology kon BJMP – Malaybalay ang usa ka lalaking nagsulay ug sulod ug gituohang illegal nga droga sa bilangguan.
Sa interview sa RMN Malaybalay ngadto kang City Jail Warden Shodji Labis sa BJMP-Malaybalay gibutyag niini nga nakumpiska nila ang duha ka mga gagmay nga putos sa gitouhang shabu gikan sa suspek.
Sigun ni Labis nga bag-o ang mao nga dalaw ug mobisita unta kini sa usa sa mga inmates sa BJMP.
Gisuk-sok matud pa niini ang mao nga butang sa iyang sapatos apan nakita ra usab kini human nga gikapkapan ug gipailawom sa hugot nga pagsusi.
Sa karon wala pa usab gihinganlan sa city jail warden ang mao nga suspek nga nakuhaan ug suspected shabu.
Matud ni Labis nga ilang gi-blotter ang mao nga tawo ug giturn-over na ngadto sa PNP Malaybalay.
