Davao City – Ihatod sa National Bureau of Investigation XI kinsa maoy lead agency nga nakadakop kang Jonas Martel Bueno didto sa Danao City, Cebu.
Matud ni NBI XI Assistant Regional Director Jonathan Balite nga ipresenta nila si Bueno sa korte nga maoy nihawid sa kaso niini.
“Ihahatid namin siya within 10 days since the time of his arrest to present the accused sa issuing court ng warrant of arrest, the Branch 25,” matud ni Balite.
Gitin-aw ni Balite nga naaresto si Bueno sa pagpusil-patay niini sa usa ka Joselito Benitez Lumen niadtong Oktobre 2, 2016 didto sa Barangay Sac-on, Carmen, Cebu pinasikad sa Warrant of Arrest nga giisyu ni Presiding Judge Jerry Dicdican sa RTC 7th Judicial Region Branch 25 sa Danao City, Cebu niadtong Pebrero 24, 2017 sa kasong Murder sukwahi kini sa unang report nga gidakop si Bueno sa pagpatay sa 62 anyos nga mag-uuma sa Danao City, Cebu nga si Trinidad Batucan.
Sumala ni Balite nga kini ilahang nahimong basehan sa pagdakop kang Bueno niadtong Marso 15 adlawng Biyernes sa gitrabahuan niining construction site.
Samtang, giangkon ni Bueno ang pagpatay niini kang Lumen kinsa iyahang nakabangi human kini niya gibadlong sa pagpanulis sa usa ka bakery niadtong 2016.
Matud ni Bueno nga sukad niadtong nahimo niya ang krimen nagtago na kini sa Talamban Cebu niadtong 2017, Buenavista, Agusan del Sur niadtong Marso 5, 2018 ug Pebrero 25, 2019 naabot kini uban ang iyahang kapuyo ug duha ka mga anak sa Davao City.
Hugot nga gibarugan sa suspek nga wala siyay kalabutan sa Batucan ug Silawan murder cases.
Nagpasalamat kini sa pagkaaresto sa gikonsiderang primary suspect sa niluog nga pagpatay sa 16 anyos nga dalagita sa Lapu-lapu City, Cebu.
“Mas maayo nga nadakpan na siya kay siya maoy nakaamong sa akong pagkatao karon nahimong ingon ani napatungan ko’g 2 million nga wala nako na nabuhat nga sala tungod lang atong lang atong nahimo nakong krimen didto sa Carmen nga si Joselito Lumen. Pasalamat ko’g dako nga nadakpan na siya,” matud ni Bueno.
Gihimakak usab ni Bueno ang pasangil ng kulto sila mag-igsuon ug dili pod siya kanhi membro sa New People’s Army.
Gipaabot niini ang iyahang mensahe ngadto sa iyahang mga kabanay sa Danao nga dili lang maguol tungod kay wala siya gipasakitan samtang napriso siya dinhi sa Davao.
RadyoMaN Aimee Guinita
